- १३ जेष्ठ २०८३, बुधबार / May 27, 2026
हुम्ला । कपाल मुण्डन गरी दिसा खुवाएर गाउँ घुमाउँदै महिलालाई कुटपिट गरेको घटनामा प्रहरीले गलत मुचुल्का बनाएको छ । जनप्रतिनिधिको दबाबमा दिसा खुवाइएको भन्ने उल्लेख नगरी मुचुल्का बनाइएको हो ।
परपुरुषसँग प्रेम–सम्बन्ध राखेको आरोप लगाउँदै १६ असोजमा हुम्ला सिमकोट–७ की महिलालाई स्थानीय बासिन्दा र जनप्रतिनिधिले कुटपिट गरेका थिए । पीडित महिलाको कपाल मुण्डन गरेर दिसा खुवाएका थिए । खबर पाएपछि गएको प्रहरी टोलीले नै उनलाई उद्धार गरेर सदरमुकाम सिमकोट लगेको थियो । घटनाको तीन दिनपछि १८ असोजमा मुचुल्काका लागि जिल्ला प्रहरी कार्यालय र धारापोरी प्रहरी चौकीको टोली गाउँमा पुगेको थियो ।
स्थानीय बासिन्दा र जनप्रतिनिधिले दबाब दिएपछि प्रहरी टोली गलत मुचुल्का बनाएर फर्किएको स्थानीयले जानकारी दिए । दिसा खुवाएको भन्ने मुचुल्कामा राखेपछि स्थानीयवासीले विरोध गरे, जनप्रतिनिधिले दबाब दिए,’ मुचुल्का बनाउन गएका प्रहरीले नै भने । प्रहरी अधिकृतलाई सिमकोट–७ का वडाध्यक्ष राजबहादुर शाहीलगायत व्यक्तिले दबाब दिएको प्रहरीको भनाइ छ ।
प्रहरीले दिसा खुवाएको विषय नराखेपछि मात्रै वडा सदस्य जयबहादुर शाहीले मुचुल्कामा हस्ताक्षर गरेका थिए । वडाध्यक्ष शाहीले भने त्यसमा पनि हस्ताक्षर गर्न नमानेको ती प्रहरीले बताए । जिल्ला प्रहरी प्रमुख डिएसपी सूर्यप्रकाश सुवेदीले पनि दिसा खुवाएको विषय मुचुल्कामा राख्न नसकिएको स्वीकारेका छन् ।
