- २ श्रावण २०८३, शनिबार / Jul 18, 2026
काठमाडौं । जलस्रोत तथा सिंचाइ विभागका पूर्व महानिर्देशक मधुकरप्रसाद राजभण्डारीविरुद्ध अकुत सम्पत्ति कमाएको आरोपमा विशेष अदालतमा मुद्दा दायर गरेको छ ।
राजभण्डारीको तीन करोड ५६ लाख ७७ हजार रुपैयाँ बराबरको सम्पत्ति अवैध देखिएको भन्दै अख्तियार दुरुपयोग अनुसन्धान आयोगले सोही बराबर बिगो भराउन र सम्पत्ति जफतको माग गर्दै सोमबार मुद्दा दायर गरेको हो ।
कैद सजायको माग गर्दै उनले आफ्नो अवैध आर्जन पत्नी दीपा श्रेष्ठको नाममा समेत राखेको अख्तियारले दाबी गरेको छ। स्रोत नखुलेको सम्पत्ति जफत गर्नुपर्ने माग अख्तियारको छ ।
२०५१ सालमा सरकारी सेवामा प्रवेश गरेका राजभण्डारी २०७६ कात्तिकदेखि २०७८ साउनसम्म विभागको महानिर्देशक बनेका थिए ।
जागीरको समयमा राजभण्डारीको कुल आय सात करोड ४२ लाख २९ हजार रुपैयाँ भएपनि त्यसमध्ये वैध आम्दानी तीन करोड ८५ लाख ५१ हजार रुपैयाँ देखिएको अख्तियारले दाबी गरेको छ ।
