- ११ कार्तिक २०८३, बुधबार / Oct 28, 2026
काठमाडौं । भारतीय ट्रकमा छुट्टै नदेखिने क्याविन कोठा बनाइ भन्सार चोरी पैठारी गरी करोडौँको चुहावट गरेको राजस्व अनुसन्धान विभागले जनाएको छ ।
रजनिशकुमार गुप्ता र राजेन्द्र थापासमेत ६ जनामाथि तीन करोड १९ लाख ७७ हजार बराबरको राजस्व छली गरेको आरोपमा उक्त रकम बराबरको बिगो कायम गरी उच्च अदालत पाटनमा मुद्दा चलाएको छ । भारतीबाट कपडा लुकाई छिपाई ल्याई चोरी पैठारी गरी राजस्व चुहावट तथा छली गरेको विभागका महानिर्देशक दीर्घराज मैनालीले बताए ।
उक्त कार्यमा मालवस्तु ढुवानीकर्ता नेपाल लजिष्टिकका सञ्चालक राजेन्द्रप्रसाद गुप्ता र बरामद मालवस्तु भएको ट्रकका चालक सुनिल कुमारको हकमा बरामद मालवस्तुको मूल्य त्रिपन्न लाख उनान्तीस हजार बिगो कायम गरी राजस्व चुहावट (अनुसन्धान तथा नियन्त्रण) ऐन, २०५२ को दफा २३ (१) बमोजिम जरिवाना तथा कैद सजायको माग गरिएको छ ।
