- १० भाद्र २०८३, बुधबार / Aug 26, 2026
काठमाडौं । देशको आर्थिकभार कम गर्न राष्ट्रपतिदेखि वडाध्यक्षसम्म सबैको तलबबाहेक अन्य सबै सुविधा कटौती गर्नुपर्ने काँग्रेसका महामन्त्री गगनकुमार थापाले बताएका छन् ।
स्वास्थ्योपचारका नाममा राष्ट्रको ढुकुटीबाट हुने खर्च रोक्न सकेमात्रै पनि देशमा बढ्दै गएको आर्थिक मन्दी कम गर्न सकिने उनको धारणा छ ।
नेपाल वितरक सङ्घको साधारण सभालाई सम्बोधन गर्दै थापाले भने, ‘सांसदले तलब पाउँछ, संसद बैठक बसेको बेला सांसदहरूले बैठकभत्ता पाउँछन् ।
त्यो ठूलो पैसा छैन । तर यो वर्ष अप्ठ्यारो परेको वर्ष भएकाले सांसदले हामी यसरी प्राप्त गरिरहेको सेवा सुविधा कटौती गर्छौं भनेर लाग्यौँ भने बल्ल देशभित्रको आर्थिक व्यवस्थापन सहज बनाउन सहयोग पुग्छ ।’
आर्थिक हिसाबले देशमा अप्ठ्यारो स्थिति पैदा भएकाले राष्ट्रपतिदेखि वडाध्यक्षसम्म सबैको अन्य सुविधा कटौती गर्नु पर्ने उनको तर्क छ ।
देशको अप्ठ्यारो फुकाउनेतर्फ लाग्नुपर्ने भन्दै मुलुकको आर्थिक वृद्धिदर खुम्चिएकाले सरकारले अब ल्याउने बजेटमा पनि निर्मम भएर खर्च कटौती गर्नु पर्ने बताए ।
