- २ भाद्र २०८३, मंगलवार / Aug 18, 2026
काठमाडौं । थाइ एयरवेजले गर्दै आएको सेल्फ ग्राउण्ड ह्याण्डलिङ नेपाल नागरिक उड्डयन प्राधिकरणले रद्ध गरेको छ ।
थाइ एयरवेजका इन्जिनियरमार्फत हुँदै आएको जहाज मेन्टिनेन्स, रिपेयर एण्ड ओभरहल सेवा आजदेखि बन्द गर्ने निर्णय भएको उपमहानिर्देशक एवं प्रवक्ता जगन्नाथ निरौलाले बताए ।
उनले भने, ‘विगत लामो समयदेखि थाइ एयरलाइन्सले गर्दै आएको सेल्फ ग्राउण्ड ह्यान्डलिङको म्याद नथप्ने निर्णय गरेको छ । सहायक कम्पनी, जिएसए कम्पनीले गर्दै आएको सेवाहरु आजका मितिदेखि बन्द भएका छन् । अब ग्राउण्ड ह्याण्डलिङको सबै काम नेपाल वायुसेवा कम्पनीले गर्नेछ ।’
थाइ एयरवेजले कोरियन, थाइ स्माइल, क्याथे प्यासिफिक, सिंगापुर लगायत विभिन्न वायुसेवालाई मर्मतसम्भारको सेवा दिँदै आएको थियो । त्रिभुवन अन्तर्राष्ट्रिय विमानस्थलमा थाइ एयरवेजले बुझाउनुपर्ने वक्यौता एक करोड रुपैयाँ भन्दा बढी छ ।
जहाजलाई सेल्फ ग्राउण्ड ह्याण्डलिङ तथा जहाज मेन्टिनेन्स, रिपेयर एण्ड ओभरहल सेवा दिँदा मुलुकको वार्षिक तीन अर्ब रुपैयाँ गुम्दै आएको उनको भनाइ छ ।
थाइ स्माइल एयरलाइन्सका प्रतिनिधिसँग लेनदेनको कुराकानी अडियो सार्वजनिक भएपछि विमानस्थलका महाप्रबन्धक प्रेमनाथ ठाकुर निलम्बनमा परेका छन् ।
