विज्ञान र प्रविधिको क्षेत्रमा राज्यको लगानी हुनु पर्छ

काठमाडौं । वर्तमान युग विज्ञान र प्रविधिको युग भएकाले वैज्ञानिक आविष्कारको क्षेत्र नबढाइ नेपालको विकास नहुने प्रधानमन्त्री पुष्पकमल दाहाल प्रचण्डले बताएका छन् ।

बालुवाटारस्थित निवासमा राष्ट्रिय आविष्कार केन्द्रका प्रमुख महावीर पुनसहितको टोलीसँगको भेटमा प्रधानमन्त्री प्रचण्डले यसको विकास अपरिहार्य भएको बताएका हुन् ।

विज्ञान प्रविधिको विकासका लागि विद्यमान ऐनमा देखिएका समस्या समाधान गरेर भएपनि अघि बढ्ने आश्वासन दिदै प्रधानमन्त्री प्रचण्डले विना हिचकिचाहट काम गर्न राष्ट्रिय आविष्कार केन्द्रका प्रमुख पुनलाई अनुरोध गरे ।

विज्ञान र प्रविधिको क्षेत्रमा राज्यको लगानी हुनु पर्ने पुनले प्रधानमन्त्रीलाई ध्यानाकर्षण गराएका थिए । कृषि, शिक्षा, ऊर्जा, पर्यटन, स्वास्थ्यलगायतका क्षेत्रमा नवीनतम आविष्कारका माध्यमबाट आत्मनिर्भर नेपाल निर्माण गर्न सकिने अनुभव राख्दै पुनले राज्यका तर्फबाट यो क्षेत्रलाई विशेष प्राथमिकतामा राख्नुपर्ने बताए ।

भेटमा राष्ट्रिय योजना आयोगका अध्यक्ष मीन बहादुर श्रेष्ठ, नेकपा माओवादी केन्द्रका विज्ञान प्रविधि विभाग प्रमुख गणेश साह, महासचिव देव गुरुङलगायत सहभागी भएका थिए ।