- ३१ जेष्ठ २०८३, आईतवार / Jun 14, 2026
काठमाण्डौ । नेपाल–भारत मैत्री पशुपति धर्मशालामा सञ्चालित बतास समूहको होटल आनन्द प्रालीसँग गरिएको करार सम्झौता रद्द गरेको छ ।
कोष र होटेल आनन्द प्रालीकाबीच धर्मशाला होटल सञ्चालनका विषयमा भएको सम्झौताअनुसारका सर्त होटेल आनन्दले पालना नगरेको भन्दै सम्झौता रद्द गरिएको पशुपति क्षेत्र विकास कोषले जनाएको छ ।
तिलगङ्गामा रहेको नेपाल–भारतमैत्री पशुपति धर्मशालामा सञ्चालित होटल आनन्द हटाउन पशुपति क्षेत्र विकास कोषले पठाएको पत्र बुझ्न बतास समूहले अस्वीकार गरेपछि कोषले सार्वजनिक सूचना निकालेर सम्झौता रद्द गरेको हो ।
संस्कृति, पर्यटन तथा नागरिक उड्डयन मन्त्रालयले पशुपति क्षेत्र विकास कोषमार्फत धर्मशाला खाली गरिदिन बिहीबार नै पत्राचार गरेको थियो । तर, बतास समूहले अस्वीकार गरेपछि कोष सञ्चालक परिषद्ले सूचना नै निकालेको हो ।
होटल आनन्द प्रालिका सञ्चालक आनन्द बतास र प्रालिका प्रतिनिधि ओस्कर बतासका नाममा सार्वजनिक सूचना निकालिएको छ ।
विकास कोष र होटल आनन्द प्रा.लि.बीचमा धर्मशाला भाडामा सञ्चालन गर्ने बारे भएको सम्झौताका सर्तहरू पालना नगरेकोले रद्द गरिएको सूचनामा उल्लेख छ ।
