पाँच दिनमै तयार भयो १२० श्यैयाको आइसोलेसन वार्ड

३१ साउन २०७७ हेटौँडा । मदन भण्डारी स्वास्थ्य विज्ञान प्रतिष्ठानअन्तर्गत हेटौँडा अस्पतालले निर्माण शुरु गरेको पाँच दिनमै १२० श्यैयाको सुविधा सम्पन्न आइसोलेसन वार्ड तयार गरेको छ ।

हेटौँडा उपमहानगरपालिकासँग सहकार्य गरेर हेटौँडा–६ स्थित गौरीटार रङ्गशालामा रहेको छात्रवास भवनमा आइसोलेसन वार्ड सञ्चालनमा ल्याइएको हो । प्रदेश मुख्यमन्त्री डोरमणि पौडेल, सामाजिक विकासमन्त्री युवराज दुलाल, प्रदेश प्रमुख सचिव डा. मानबहादुर विश्वकर्मा, हेटौँडा उपमहानगरपालिका प्रमुख हरिबहादुर महत, प्रदेश प्रहरी प्रमुख वसन्तकुमार लामालगायत विज्ञको टोलीले अवलोकन समेत गरिसकेको छ ।

मकवानपुरमा अप्रत्याशित रुपमा कोरोना सङ्क्रमितहरुको सङ्ख्या बढ्दै गएपछि सङ्क्रमितलाई घरमै राख्नुपर्ने बाध्यता अन्त्य गर्न यो तयार पारेको हेटौँडा अस्पताल व्यवस्थापन समितिका अध्यक्ष प्रकाश पौडेलले बताए । नवनिर्मित आइसोलेसन वार्डमा नेपाल प्रहरीका नौसहित १२ जना कोरोना सङ्क्रमितलाई राखिएको छ ।