- १३ भाद्र २०८३, शनिबार / Aug 29, 2026
प्यूठान । पुल निर्माण गर्न थालेको पाँच वर्ष बितिसक्दा पनि झिमरुक नदीको वारिपारि दुईवटा पिलरमात्रै ठडिएका छन् । २०७४ मा निर्माण सुरु भएको ऐरावती गाउँपालिकाको झिवाङमा पुलको अहिलेसम्म १० प्रतिशतमात्रै काम भएको हो ।
पुल नहुँदा वर्षायाममा गाउँ सडक सञ्जालसँग विच्छेद हुने गरेको ऐरावती–५ झिवाङका रामबहादुर रोका क्षत्रीले बताए । समयमै पुल निर्माणको काम नहुँदा आफूहरूलाई समस्या भइरहेको स्थानीयले बताएका छन् ।
पुल अभावमा यातायातका साधन चल्न सकेका छैनन् । १२ करोड २४ लाख ५९ हजार ७ सय ७४ रुपैयाँमा पुलको ठेक्का सम्झौता भएको थियो । सपना जयबागेश्वरी जेभीले निर्माणको ठेक्का पाएको हो ।
११ करोड ७९ लाख ८० हजार ६ सय ४१ रुपैयाँ लागतमा ठेक्का सम्झौता भएको बरौला–अर्लावाङ जोड्ने पक्की पुल पनि सम्झौता भएको मितिले दुई वर्ष बितिसक्दा पनि काम सुरु भएको छैन । ठेकेदार कम्पनीले डिजाइन अनुसारको पुल निर्माण गर्न नसकिने बताउँदै आएको छ ।
सपना जयबागेश्वरी जेभीका प्रतिनिधि वीरेन्द्र शाहीले पुलको डिजाइनमै समस्या रहेको बताए । दुईवटै पुलमा पाइल फान्डेसनमार्फत निर्माण गर्ने सम्झौता भएको हो ।
तर, उक्त स्थानमा पाइल फाउन्डेसनमा पुल बनाउन सकिने अवस्था छैन । पुल निर्माण गर्ने स्थानमा कडा खालको चट्टान हुँदा समस्या भएको भन्दै ठेकेदार कम्पनीले झिवाङ र बरौलाका दुवै पुलको पुनः स्टिमेटका लागि सडक डिभिजन कार्यालयमा निवेदन दिएका छन् ।
