- ९ श्रावण २०८३, शनिबार / Jul 25, 2026
गोरखा । वर्षासँगै आएको बाढीले पालुङटार नगरपालिका–९ स्थित खारखोलाको पुलमा क्षति पुगेको छ । पानीको बहाव बढेर खोलाले पुलको एकातर्फको भागमा कटान गरेको छ । पुलमा अहिले आउजाउ बन्द भएको स्थानीयले बताए ।
‘खोलाले पुलको एकातर्फको भाग कटान गरेको छ, पुलमा क्षति पुगेकाले आउजाउ गर्न रोकीएको छ ।’ दिपक अधिकारीले भने । पुल हुदै धर्मोदय माध्यमिक बिद्यालयमा अध्ययनरत करिब १०० भन्दा बढी विद्यार्थी आउजाउ गर्न रोकिएका छन् ।
पारिडिहिका स्थानीयलाई बिर्दि बजार आउन पनि पुल प्रयोग गर्नुपर्ने बाध्यता थियो तर त्यही पुलमा क्षती पुगेकोले रोकिएको छ । आवतजावत रोकिंदा स्थानीय समस्यामा परेका छन् । बेलैमा तारजालीको व्यवस्था गरेर कटान क्षेत्रलाई संरक्षण गर्न सके पुल जोगिन सक्ने स्थानीयले बताए ।
पुलको स्थलगत निरिक्षण गरेर संरक्षणका लागि आवश्यक पहल गरिने वडाध्यक्ष भेजराज पाण्डेले बताए । चार बर्ष अघि गोरखा नगरपालिका र वडाको गरी करिब ३५ लाख बजेट खर्चेर सो पुल निर्माण गरिएको थियो ।
