पोखरामा इन्टरनेट सेवा बन्द

पोखरा । नेपाल विद्युत् प्राधिकरणले इन्टरनेट सेवा प्रदायकहरूको मुख्य अपरेशन सेन्टरमा विद्युत् विच्छेद गरेकोले पोखरामा इन्टरनेट सेवा बन्द भएको छ ।

जसका कारणले इन्टरनेट बन्द भएको सेवा प्रदायकहरूको संस्था आईस्पानले जनाएको छ ।अत्यावश्यक सेवासम्बन्धी कानुन र मानव अधिकारकै विद्युत् प्राधिकरणले उल्लङ्घन गरेको आईस्पानले आरोप लगाएको छ ।

प्राधिकरणले विद्युत् विच्छेद गरेपछि वैकल्पिक माध्यमबाट सेवा दिने कोसिस गरे पनि सम्भव नभएको आईस्पानले बताएको छ । प्राधिकरण यसको जिम्मेवार भएकाले क्षतिपूर्ति पनि उसैले दिनुपर्ने आईस्पानले जनाएको छ ।

विद्युत् प्राधिकरणले एकतर्फीरूपमा बढाएको सात सय प्रतिशतसम्मको पोल भाडा दिन नमानेकै कारण छानी–छानी इन्टरनेट सेवा प्रदायकको तार काट्ने र विद्युत् विच्छेद गर्ने काम भएको आईस्पानको भनाइ छ ।

यता विद्युत् प्राधिकरणले भने इन्टरनेट सेवा प्रदायकले प्राधिकरणको पोल प्रयोग गरेर उपभोक्तालाई चर्को मूल्यमा इन्टरनेट बेचेको, भाडा तिर्न आनाकानी गरिरहेको आरोप लगाएको छ ।