प्रतिनिधि सभा र प्रदेश सभा निर्वाचनको मिति केही दिनमा तय हुने

काठमाण्डौ । प्रतिनिधि सभा र प्रदेश सभा चुनावको प्रस्तावको तयारी निर्वाचन आयोगले गरेको छ । कात्तिकको अन्तिममा निर्वाचन गर्नेगरी सरकारलाई प्रस्ताव गर्ने तयारी निर्वाचन आयोगले थालेको हो ।

यसअघि दुई चरणमा चुनाव गर्ने निष्कर्षमा पुगेको आयोग अब भने एकै चरणमा गर्ने टुङ्गोमा पुगेको छ । प्रधानमन्त्री शेरबहादुर देउवालाई भेटेर चुनावको मिति प्रस्ताव गर्ने आयोगले जनाएको छ ।

देशभर मतदाता नामावली सङ्कलनको काम गरिरहेको छ भने चुनावको मिति घोषणा नहुँदासम्म मतदाता नामावलीमा नाम दर्ता र अद्यावधिक गर्न सकिने आयोगले जनाएको छ ।

आफ्नो स्थायी ठेगाना रहेको जिल्लाबाहिर बसोबास रहेकाहरुले समेत बसोबास रहेकै जिल्लाको निर्वाचन कार्यालय पुगेर नाम दर्ता गर्न सक्ने उल्लेख गरिएको छ । आयोगका अनुसार ७७ जिल्लाका निर्वाचन कार्यालय, ७७ वटै जिल्ला प्रशासन कार्यालय र ७३ इलाका प्रशासन कार्यालयबाट मतदाता नामावलीमा नाम दर्ताको काम भइरहेको छ ।

१ सय ६५ प्रतिनिधि सभा निर्वाचन क्षेत्र र ३ सय ३० वटै प्रदेश सभा निर्वाचन क्षेत्रमा एकै दिन एकै चरणमा चुनाव गर्ने आयोगको तयारी छ । चुनावको लागि कात्तिक ३० गतेको मिति उपयुक्त हुन सक्ने आयोगले खाका तयार पारेको समेत जनाइएको छ ।