- १८ असार २०८३, बिहीबार / Jul 2, 2026
धनुषा । प्रहरीको भ्यानबाट हाम फालेर एक जना थुनुवा फरार भएका छन् ।
जबरजस्ती करणी मुद्दामा इलाका प्रहरी कार्यालय सबैलाको नियन्त्रणमा रहेका राजबाबु मुखिया भ्यानबाट हाम फालेर फरार भएका हुन् ।
जनकपुरधामस्थित जिल्ला अदालत धनुषामा म्याद थप गराई सबैलातर्फ फर्कने क्रममा सहीदनगर नगरपालिका–३, यदुकुहाबाट आइतबार साँझ ७ बजे फरार भएको जिल्ला प्रहरी कार्यालय धनुषाका प्रवक्ता तथा प्रहरी नायव उपरीक्षक वेदप्रसाद गौतमले बताए ।
फरार थुनुवा सबैला नगरपालिका–१३, किरतपुरको रहेको जानकारी दिए । फरार थुनुवाको खोजी कार्य तीव्र रूपमा भइरहेको प्रवक्ता गौतमले बताए ।
धनुषामा प्रहरी हिरासतबाट छ जना थुनुवा फरार भएको घटनाको एक महिना नपुग्दै फेरि एक जना थुनुवा प्रहरी नियन्त्रणबाट फरार भएका हुन् ।
