- ३ भाद्र २०८३, बुधबार / Aug 19, 2026
काठमाडौं । ग्लोबल अनलाइन पोलमार्फत् बालन डि अर ड्रिम टिम घोषणा गरिएको छ । सर्वकालिन उत्कृष्ट फुटबलरका लागि फ्रान्स फुटबलले सुरु गरेको भोटिङ पोलमा अहिले सक्रिय फुटबलमध्ये अर्जेन्टिना तथा बार्सिलोनाका कप्तान लियोनल मेस्सी र पोर्चुगल तथा युभेन्ट्सका क्रिष्टियानो रोनाल्डो अटाएका छन् । उक्त टिमको फर्मेसन ३–४–३ रहेको छ । जसमा विश्व फुटबलमा अहिलेसम्मका महान फुटबलरहरु समावेश भएका छन् । ड्रिम टिममा अहिलेसम्मका सबैभन्दा उत्कृष्ट खेलाडीको स्थान भने रुसका लेभ यासिनले सुरक्षित गरेका छन् ।
उनले सन् १९५४ देखि १९७० सम्म गरि सोभियत युनियनका लागि ७४ खेल खेलेका थिए । रक्षापङ्तीमा इतिहासकै सबैभन्दा उत्कृष्ट फुटबलमा काफु, फ्रान्ज बेकेनबाउएर र पाउलो माल्दिनीले भोट पाएका छन् । यस्तै, डिफेन्सिभ मिडफिल्डमा जाभि हेर्नान्डेजले सबैभन्दा बढी भोट पाउँदा लोथर माथ्युसले उनीभन्दा केही कम भोट पाएका छन् भने अट्याकिङ मिडफिल्डमा विश्व विजेताद्वय डियागो म्याराडोना र पेलेले स्थान बनाएका छन् ।
फरवार्डमा भने विश्वकप २००२ ब्राजिललाई जिताउन सघाएका रोनाल्डो छन् । उनीसँगै ६ पटकका बालन डिओर , ६ पटक गोल्डेन बुट, ४ पटक च्याम्पियन्स लिग जितेका मेस्सी छन् भने साथमा ५ पटक बालन डिओर, ५ पटक च्याम्पियन्स लिग उपाधि हात पारेका क्रिष्टियानो रोनाल्डो छन् ।
यस्तो छ ड्रिम टिम
गोलरक्षक – लेभ यासिने
डिफेन्डर – काफु, फ्रान्ज बेकेनबाउएर र पाउलो माल्दिनी
मिडफिल्डर – जाभि, लोथर माथ्युस, डियागो म्याराडोना, पेले
फरबार्ड – लियोनल मेस्सी, क्रिष्टियानो रोनाल्डो र रोनाल्डो
