बासु मा.वि.मा औद्योगिक प्रशिक्षार्थी दिवस

भक्तपुर । भक्तपुर ब्यासीस्थित बासु माध्यमिक विद्यालयमा औद्योगिक प्रशिक्षार्थी दिवस मनाइएको छ । विद्यालयले यो वर्षदेखि सञ्चालन गर्न लागेको निःशुल्क प्रि–डिप्लोमा तह सूचना प्रविधि विषयको औद्योगिक प्रशिक्षार्थी तालिमको तयारी स्वरुप सोमबारऔद्योगिक प्रशिक्षार्थी दिवस मनाएको हो ।

कार्यक्रममा सूचना प्रविधि क्षेत्रमा सीप सिकेर दक्ष प्राविधिक बनेर देशमै रोजगार बन्न सकिने प्रचुर सम्भावना रहेको कम्प्युटर एशोसियशन नेपाल (क्यान) महासंघका सचिव बुद्धरत्न मानन्धरले बताए । लाखौं युवाहरु अरब र खाडी मुलुकहरुमा रोजगारीका विदेशीनु परेको दुःखलाई कोट्याउँदै सूचना प्रविधिसम्बन्धी ज्ञान र सीप हासिल गरी नेपालमै काम गर्न प्रशिक्षार्थीहरुलाई अनुरोध गरे ।

आफूले अध्ययन गर्दा महँगो शिक्षा पाउन जग्गाजमिन नै बेच्नुपरेको स्मरण गर्दै प्रशिक्षार्थीहरुले निःशुल्क अध्ययन गर्ने मौका पाउनुको साथसाथै आम्दानीसमेत हुने हुदा तालिम नयाँ पुस्ताको निम्ति सुनौलो अवसर भएको धारणा राखे । सैद्धान्तिक एवं प्रयोगात्मक शिक्षा नै आजको आवश्यकता भएको सचिव मानन्धरले बताए ।

विद्यालयका प्रधानाध्यापक अम्बिका न्याइच्याईले सूचना प्रविधि विषयमा विद्यार्थीहरुको रुचि र आवेदन देखेर खुसी भएको बताइन् । उनले तालिममार्फत् देशको निम्ति आवश्यक दक्ष मानव संशाधन तयार हुने जानकारी दिइन् । कार्यक्रममा भक्तपुरमा सूचना प्रविधि क्षेत्रमा क्रियाशील विभिन्न उद्योग,कम्पनी,व्यवसाय,संस्थाहरुका साथै आवेदन दिएका प्रशिक्षार्थीहरुको उल्लेख्य सहभागिता रहेको थियो ।

उक्त कार्यक्रममा डिप्लोमा तहका संयोजक रमेश प्रजापतिले कार्यक्रमको उद्देश्यबारे प्रकाश पारेका थिए । तालिममा ६५ जना प्रशिक्षार्थी आबद्ध भएको विद्यालयले जनाएको छ ।