- ५ आश्विन २०८३, सोमबार / Sep 21, 2026
काठमाडौं । कृषि तथा पशुपन्छी विकास मन्त्रालयले भारतबाट कच्चा दूध ल्याउन डेरी उद्योगीहरूलाई अनुमति दिएपछि किसानहरु रिसाएका छन् । चाडपर्वको समय दूधको अभाव नभएपनि डेरी उद्योग सङ्ग कृषि मन्त्रालयसँग दूध आयातको अनुमति दिएपछि किसान रिसाएका हुन ।
प्रतिदिन एक लाख २० हजार लिटर दूध आयात गर्न मन्त्रालयले अनुमति दिएको हो । सरकारी स्वामित्वमा रहेको दुग्ध विकास संस्था लाई ४० हजार र निजी क्षेत्रका डेरीलाई ८० हजार लिटर दैनिक रूपमा ल्याउन दिने अनुमति दिएको छ ।
कृषि मन्त्रालयले यसरी दूध आयातको अनुमति दिएपछि केन्द्रीय दुग्ध सहकारी सङ्घ लिमिटेड नेपाल, चितवन जिल्ला दुग्ध उत्पादक सहकारी सङ्घलगायत सङ्घसंस्थाले यो कदमको चर्को विरोध गरेका छन् । चितवन जिल्ला दुग्ध उत्पादक सहकारी सङ्घ र केन्द्रीय दुग्ध सहकारी सङ्घ लिमिटेडले पत्रकार सम्मेलन गरेर विरोध गरेका हुन ।
नेपालको माग अनुसार दूध नेपालमै उत्पादन भइरहेको अवस्थामा विभिन्न बहाना बनाएर भारतबाट आयात गर्नुमा नियत नै कमिशन खाने भएको आरोप लगाएको छ । चितवन जिल्लामा रहेका दुग्ध उत्पादक सहकारीबाट खरिद गरेको दूधको पैसा नतिर्ने डेरी उद्योगले भारतबाट नगद तिरेर ल्याउन नपाउने सहकारी सङ्घका अध्यक्ष रत्नमणि न्यौपानेले बताए ।
यता नेपाललाई अहिले कति परिमाणमा दूध आवश्यक छ भन्ने कुरा नत कृषि तथा पशुपन्छी विकास मन्त्रालयलाई थाह छ नत सरकारसँग तथ्याङ्क नै छ । यता २०७५ सालदेखि भारतबाट नेपालमा दूध ल्याउन बन्द गरिएको सङ्घले जनाएको छ ।
किसानको विरोधका बाबजुत भारतबाट दूध आयात भएमा नारायणगढमा किसानहरु भेला भएर भारतबाट ल्याएको दूध नारायणी नदीमा बगाइदिने चेतावनी दिएका छन् ।
