- ९ बैशाख २०८३, बुधबार / Apr 22, 2026
२२ असार २०७७ धनुषा । जनकपुरधाम उपमहानगरपालिका २१ कुर्थाकी ११ वर्षीया बालिकाको भारतीयले बलात्कारपछि हत्या गरेको पुष्टि भएको छ । हत्यामा संलग्न एक भारतीयलाई प्रहरीले पक्राउ गरेको छ । भारतको उत्तर प्रदेश राज्यको मलिहाबाद जिल्ला काकोरी ग्राम पञ्चायत ११ निवासी ३२ वर्षीय दीपु सिंह पक्राउ परेका हुन ।
उनले बालिकालाई बलात्कार गरी हत्या गरेको स्वीकारेको प्रहरी प्रवक्ता रामेश्वर कार्कीले बताए । गत शुक्रबार भैंसी चराउन गएकी ११ वर्षीय बालिकाको शव अर्धनग्न अवस्थामा घरदेखि १ किलोमिटर टाढा दूधमती खोला छेउमा फेला परेको थियो । दूधमती खोला छेउमै रहेको चौधरी र मिश्र इन्डष्ट्रिजमा ५ महिनायता काम गर्दै आएका भारतीयले आँपको प्रलोभन देखाएर करणी गरेको बुझिएको छ ।
सिंहले आँप दिने प्रलोभन देखाइ ललाइफकाइ इन्डष्ट्रिजको पछाडिपट्टिको बगैंचाको एकान्त कुनामा लगेर करणी गरेको स्वीकारेको प्रहरीले जनाएको छ । हत्यापछि सिंहले बालिकालाई ब्ल्यांकेटमा बेरेर दूधमती नदीको डिलमा रहेको झाडीमा फालेको बताए । सिंहलाइ थप अनुसन्धान गरेर कडा कारबाही गरिने प्रहरीको भनाइ छ ।
