- ११ असार २०८३, बिहीबार / Jun 25, 2026
काठमाडौं । मंगलबारदेखि नारायणगढ–मुग्लिन सडकखण्डमा पुलहरु निर्माण गर्न दैनिक चार घण्टा सवारी साधन रोकिने जनाइएको छ । मंगलबार देखि एक महिनाका लागि दैनिक ४ घण्टा सडकमा सवारी आवागमन रोकेर काम गर्न लागिएको जनाइएको हो । नारायणगढ–मुग्लिन सडकखण्डमा पर्ने पुलहरुको निर्माण गर्न सडकको भित्तो काट्नुपर्ने जस्ता कार्यहरुका लागि सवारी रोकेर काम गर्न लागिएको नारायणगढ–मुग्लिन सडक आयोजनाले जानकारी गराएको छ ।
नारायणगढतर्फबाट जाने यात्रुबाहक बस, मिनिबस, माइक्रो बस, साना सवारीसाधनलाई पन्ध्र किलो बजारदेखि जुगेडीसम्म बिहान ११ बजे रोकिने र मालवाहक ट्रक, लरी, ट्रेलर, टिपर, ट्यांकरलगायत भारी सवारी साधनलाई भतेरी जंगलदेखि रामनगरसम्म बिहान १०ः५० बजेदेखि रोकिने जनाइएको छ ।
आयोजनाका अनुसार बिहान ११ बजेदेखि दिउँसो ३ बजेसम्म आवागमन रोकिने जनाइएको छ ।
भौगोलिक रूपमा कठिन सिमलताल, कालीखोला, तुइनखोला र चिसेन्जी खोलामा पुल निर्माणका लागि पहाड काट्नेलगायतका कामका लागि सवारी आवागमन रोकिएको उल्लेख गरिएको छ । काठमाडौंतर्फबाट जाने मालवाहक सवारीलाई लेबाटारमा र पोखरातर्फबाट आउनेलाई मालवाहक सवारीलाई आँबुखैरेनीमा बिहान १०ः४५ बजे रोकिने छ ।
एम्बुलेन्स, दमकललगायतका अत्यावश्यकीय सवारीलाई अनुकूलता हेरी छोड्ने बताइएको छ भने काठमाडौंबाट जाने यात्रुबाहक सवारीलाई मुग्लिन बजारदेखि मनकामना केवलकार गेटसम्म र पोखरातर्फबाट आउने यात्रुबाहक सवारी साधनलाई बेनीटारदेखि मस्र्याङ्दी पावर हाउससम्म बिहान १०ः५५ बजे रोकिने छ ।
