- २० श्रावण २०८३, बुधबार / Aug 5, 2026
काठमाडौं । नेकपा उपाध्यक्ष वामदेव गौतमले अध्यक्षद्वय ओली र प्रचण्डलाई भेटेर आफू राष्ट्रिय सभा र सरकारमा जाने बताएका छन् ।
पार्टी निर्णय कार्यान्वयनको अडान राख्दै राष्ट्रिय सभाको सांसदमा मनोनीत हुने रुचि राखेपछि समाधानको तहमा पुगेको नेकपाको विवाद पुनः बल्झिने संकेत देखिएको छ ।
अर्थमन्त्रीमा डा. युवराज खतिवडालाई निरन्तरता दिने गरी राष्ट्रपतिबाट मनोनीत हुने राष्ट्रिय सभाको सांसदमा सिफारिस गर्ने तयारी गरिरहेकै वेला गौतमले सोमबार सार्वजनिक रूपमै मलाई राष्ट्रिय सभामा लैजाउ भनेपछि विवाद बल्झिने संकेत देखिएको हो । गौतमले प्रधानमन्त्री ओली र पार्टी अध्यक्ष पुष्पकमल दाहाल प्रचण्डलाई सोमबार भेटेर नै सो विषयमा अडान लगेको नेकपाले जनाएको छ ।
बिहान बालुवाटार पुगेका गौतमले पुरानो निर्णयअनुसार आफू राष्ट्रिय सभामा जाने र सरकारमा पनि सहभागी हुने इच्छा व्यक्त गरेको बालुवाटार स्रोतले बताएको छ । तर ओली नै गौतमका लागि तगारो बनिरहेको स्रोतको दावि छ ।
