- ९ आश्विन २०८३, शुक्रबार / Sep 25, 2026
काठमाडौं । क्रिकेट राष्ट्रिय टोलीका कप्तान सन्दीप लामिछाने त्रिभुवन अन्तर्राष्ट्रिय विमानस्थलबाटै पक्राउ परेका छन् । उनी विमानबाट ओर्लिएलगत्तै प्रहरीले नियन्त्रणमा लिएको हो ।
आफू आज स्वदेश फर्किन लागेको जानकारी उनले सामाजिक सन्जालमार्फत् दिएका थिए । विमानस्थलमा बिहान १० बजे नै ओर्लिने भने पनि खराब मौसमका कारण विमान ढिला अवतरण भएको थियो ।
दोहाबाट काठमाडौं सवार कतार एयरवेजको जहाजले केहीबेर आकाशमा फन्को लगाएको थियो । विदेशमै रहेको बेला गत भदौ २१ गते एक बालिकाले बलात्कार गरको जाहेरी दिएकी थिइन् ।
आफूविरुद्ध उजुरी पर्दा उनी क्यारेबियन लिग खेल्न नेपाल बाहिर थिए । उनी विरुद्ध नेपाल प्रहरीको आग्रहअनुसार अन्तर्राष्ट्रिय प्रहरी संगठन इन्टरपोलले डिफ्युजन नोटिस जारी गरेको थियो ।
विमानस्थलबाटै पक्राउ गरेको प्रहरीले वृत्त, गौशालामा लगेको छ । आजै उनको मेडिकल चेकजाँच हुने प्रहरीले बताएको छ । अदालतमा भने आइतबार मात्र उपस्थित गराइनेछ ।
भोलिसम्म दशैंको विदा र पर्सि शनिबारका कारण अदालत बन्द हुनेछ । आइतबार अदालत खुलेपछि म्याद थपका लागि उनलाई उपस्थित गराइनेछ ।
