- २८ श्रावण २०८३, बिहीबार / Aug 13, 2026
काठमाडौं । राष्ट्रिय किताबखानाले नेपाल सरकारका सचिव र सहसचिवलाई आफ्नो व्यक्तिगत विवरण अद्यावधिक गर्न ७ दिने अल्टिमेटम दिएको छ ।
संघीय निजामती सेवा ऐन जारी हुन लागेको बेला एक सूचना जारी गरेर निजामती सेवा नियमावली (२०५०) को नियम १० मा भएको व्यवस्थाबमोजिम यस्तो निर्णय गरिएको किताब खानाले जनाएको छ।
सरकारले विज्ञताका आधारमा कर्मचारी खटाउने तयारी गरिरहेको छ । सचिव र सहसचिव पदमा पुगेका कर्मचारी पनि सुरुमा खरिदार वा नासुसरहको पदबाट सेवा प्रवेश गरेको भए उनीहरूको व्यक्तिगत विवरणमा एसएलसी वा प्रवीणता प्रमाणपत्र तहको मात्र शैक्षिक योग्यता रहेको तर त्यसपछि अद्यावधिक भए नभएको बुझ्न विवरणबारे जानकारी लिन खोजिएको हो ।
विवरण अद्यावधिक गर्न किताब खानाको वेबसाइटमा रहेको इमेलमार्फत वा स्वयं कागजात लिई पुलचोकस्थित कार्यालयमा गई विवरण अद्यावधिक गर्न सकिने छ ।
हाल निजामती सेवामा सचिवसरहका ७० र सहसचिव सरहका सबै सेवा समूहका झन्डै ७ सय ५३ कर्मचारीहरू कार्यरत रहेका छन् ।
