सद्भाव र समर्पण भावको ‘राखी पर्व’ धुमधामका साथ मनाइँदै

काठमाडौं । आज ‘राखी’ पर्व धुमधामकासाथ मनाइँदै छ । साउन पूर्णिमालाई विशेष दिनका रुपमा दिदीबहिनीले दाजुभाइको सौर्य वृद्धिको कामना गर्दै दाहिने हातका नाडीमा रक्षासूत्र बाँधिदिने परम्परा अनुसार यो पर्व मनाइदै आएको छ ।

तराईंमा आज दाजुभाइ तथा दिदीबहिनीहरुले राखीमय बनाइरहेका छन् । बिहानैदेखि बजार खुलेका छन् । रङ्गीचङ्गी ‘राखी’ बेच्न राखिएका छन् । विभिन्न रङका रक्षासूत्र किन्न चोकचोकमा भीड नै देखिएको छ ।

राखीसँगै दाजुभाइलाई खुवाउन मिष्ठान्न परिकारले मिठाइ पसल पनि भरिभराउ भएका छन् । आज दाजुभाइ÷दिदीबहिनीबीच प्रेम, सद्भाव र एकअर्काप्रतिको समर्पण भाव झल्कने गीत पनि गुञ्जिरहेका छन् । हिन्दू परम्परा अनुसार रक्षावन्धन पर्वकै एक अङ्गका रूपमा राखी स्थापित भएको जानकार बताउँछन् ।

पर्वमा गुरुपुरोहितले अभिमन्त्रित डोरा शिष्य र यजमानलाई बाँधिदिने चलन पनि छ । सत्ययुगमा तीनै लोक (स्वर्ग, मत्र्य र पाताल)को अधिपति रहेका दानवराज बलिलाई उनका गुरु शुक्राचार्यले देवतासँगको युद्धमा जानअघि शास्त्रोक्त विधिले अभिमन्त्रित गरिएको डोरा (रक्षाकवच, रक्षासूत्र) बाँधिदिएको विश्वासमा पुरोहितबाट डोरा बाँध्ने चलन छ ।

त्यसैसँग जोडिएका अर्को प्रसङ्गमा बलिका बहिनी गङ्था र यमुनाले युद्धमा जानअघि विजयको कामना गर्दै हातमा रक्षावन्धन (रक्षाकवच) बाँधिदिएको र सो युद्धमा बलिको जित भएको सम्झनामा प्रत्येक वर्षको साउन पूर्णिमाका दिन दिदीबहिनीले आफ्ना दाजुभाइको सौर्य वृद्धिको कामना गर्दै राखी बाँधिदिने परम्परा बसेको विद्धानहरुको भनाइ छ ।