सबैभन्दा अग्लो नेपाल आमाको मूर्ति बन्दै

कञ्चनपुर । भीमदत्त नगरपालिका– ८ तिलाचौरस्थित धार्मिक पर्यटकीय क्षेत्र भम्केनीमा ७५ फिट अग्लो नेपाल आमाको मूर्ति निर्माणको कार्य भइरहेको छ । मूर्ति निर्माणका लागि १० करोड ८१ लाखमा ठेक्का सम्झौता गरिएको छ ।

निर्माण कम्पनीले मूर्तिको नमूना तयार गरी कार्य अगाडि बढाएको छ । नेपाल आमाको निर्माण हुने मूर्तिका तीन वटा नमूना तयार गरेको काठमाडौंबाट विज्ञ टोलीले मूर्तिको नमूनाको अवलोकन, अध्ययन र विश्लेषण गरी तयार गरेको प्रतिवेदनका आधारमा मूर्ति छनोट गरिने छ ।

मूर्तिको फाउन्डेसनमा बन्ने कमलको फूललगायतको संरचना निर्माणको कार्य निर्माण कम्पनीले पूरा गरेको महाकाली शारदापीठ भम्केनी धामका सचिव बिर्खबहादुर मल्लले बताए । सम्झौता भएको साढे तीन वर्षभित्र मूर्ति निर्माण सम्पन्न गर्नुपर्ने छ । पैदलयात्रा गरेर सङ्कलन गरेको दुई करोड, भीमदत्त नगरपालिकाले ५० लाख, प्रदेश सरकारको ५० लाख र सङ्घीय सरकारको ५० लाख मूर्ति निर्माणका लागि लगानी गरिएको छ ।

अष्टधातुबाट बनाइने मूर्ति निर्माणका लागि २५ टन तामा आवश्यक पर्ने र अहिले २२ टन मात्रै तामा रहेको छ । दुई वर्ष नौ महिनामा मूर्ति निर्माण गरिसक्ने योजना कम्पनीको छ । मूर्ति निर्माणमा १२ हजार श्रमिक लाग्ने बताइएको छ । तीन रोपनी जग्गामा मूर्ति निर्माण गरिने छ । दाँयाबाँया गाई र बाघको मूर्ति, नेपालको नक्सा, नेपालका राष्ट्रिय प्रतीक चिह्न र नेपालको सबै तीर्थको प्रतिनिधित्व हुने गरी सङ्ग्रहालयसमेत निर्माण गरिने छ ।