सिद्धार्थ राजमार्ग फेरी अवरुद्ध

वालिङ्ग । वर्षासँगै आएको पहिरोका कारण सिद्धार्थ राजमार्ग फेरी अवरुद्ध भएको छ ।

सिद्धार्थ राजमार्गअन्तर्गत पोखरा–स्याङ्जा सडकखण्ड आज बिहान देखि अवरुद्ध भएको हो । स्याङ्जाको फेदीखोला गाउँपालिका–२ भालुपहाडमा ढुङ्गासहितको पहिरो खसेका कारण सडक अवरुद्ध भएको स्याङ्जाका प्रहरी प्रवक्ता राजेन्द्रप्रसाद अधिकारीले बताए ।

ठूलो चट्टानसहितको पहिरोले सडक पूर्णरुपमा अवरुद्ध भएकाले खुलाउन पहल भइरहेको उनको भनाइ छ । सडक अवरुद्ध हुँदा सिद्धार्थ राजमार्गको पोखरा–स्याङ्जा सडकमा सयौँ सवारी साधन रोकिएका छन् । सडक खुलाउन समय लाग्ने भएकाले तत्काल यो सडक भएर यात्रा नगर्न सुझाव दिए ।