- ३१ जेष्ठ २०८३, आईतवार / Jun 14, 2026
मुस्ताङ । हिमपहिरोमा परेर १२० याक र चौरी बेपत्ता भएका छन् । मानापाथी हिमालबाट खसेको हिउँपहिरोमा परेर थासाङ गाउँपालिका–२ को जङ्गलमा चराउन लगिएका कोवाङ, लार्जुङ, बोक्सीखोला र नाउरिकोटमा रहेको दुई गोठका याक र चौँरीगाई बेपत्ता भएका हुन् ।
हिउँपहिरोले नाउरीकोटका घरको छानासमेत उडाएको वडा अध्यक्ष नरप्रसाद हीराचनले बतााए । भागदौड मच्चिदा सामान्य घाइते भएका कोबाङको जनआदर्श अमरसिङ माविका ११ जना शिक्षक विद्यार्थी जोमसोममा उपचारपछि घर फर्किएको उनको भनाइ छ ।
पहिरोमा पसेका भीम शेरचन र सकेन्द्र गौचनका ६५-६५ वटा याक चौँरीमध्ये १०-१२ वटा मात्र भेटिएका छन् । सो क्षेत्रमा भएका गोठालाहरु भने सुरक्षित सम्पर्कमा आएको प्रहरीको भनाइ छ ।
१३० याक चौँरीमध्ये बाइनाकुलरले हेर्दा १०-१२ मात्र देखिएको र बेपत्ता भएका चौंरीहरु हिमपहिरोले पुरिएको हुनसक्ने अनुमान गरिएको प्रमुख जिल्ला अधिकारी नेत्रप्रसाद शर्माले बताए ।
