- ३० जेष्ठ २०८३, शनिबार / Jun 13, 2026
काठमाडौं । चाडपर्वलाई लक्षित सार्वजनिक सवारी साधनको टिकट बुकिङ खुला भएको छ । भौतिक पूर्वाधार तथा यातायात मन्त्रालयमा शुक्रबार बसेको सर्वपक्षीय बैठकले आजदेखि दसैँको टिकट बुकिङ खुला गर्ने निर्णय गरेको थियो ।
सोही अनुसार नेपाल यातायात व्यवसायी महासङ्घले चाडपर्वमा यात्रुलाई सुरक्षित रूपमा गन्तव्यमा पुर्याउने जिम्मेवारी यातायात व्यवसायीको भएकाले अग्रिम टिकट बुकिङ खुलाइएको हो। उपत्यकामा झन्डै एक दर्जन स्थानबाट दसैँंको अग्रिम टिकट बुकिङ खुला गरिएको महासङ्घका अध्यक्ष विजय स्वाँरले बताए । अनलाइन र म्यानुअल दुवै तवरबाट दसैँको टिकट बुकिङ गर्न सकिने छ ।
बस सेवा डट कमको एपबाट अग्रिम बुकिङ खुला भएको दिनबाटै टिकट काट्न सकिने यातायात व्यवसायीले बताएका छन् । दसैँमा करिब १० लाखभन्दा धेरै यात्रु घर फर्किने गरेको ट्राफिक प्रहरीले जनाएको छ । दशैंको अग्रिम टिकट बुकिङ खुला गरिएको भन्दै व्यवस्थित ढङ्गले यात्रुलाई आफ्नो गन्तव्यमा पठाइने यातायात व्यवस्था विभागका महानिर्देशक उद्धवप्रसाद रिजालले दाबी गरे ।
