- ११ श्रावण २०८३, सोमबार / Jul 27, 2026
काठमाडौं । सहिद स्मारक ‘ए’ डिभिजन लिग अन्तर्गत आज (शनिबार) तीन खेल हुँदैछन् । दशरथ रंगशालामा दुई र पोखरा रंगशालामा एक खेल हुने कार्यतालिका सार्वजनिक भएको छ ।
दिउँसो १ बजे दशरथ रंगशालामा हुने पहिलो खेलमा ललितपुर डर्बीमा थ्री स्टार क्लब र जावलाखेल युथ क्लब भिड्दैछन् । थ्री स्टार ६ खेलमा सात अंकसहित आठौं स्थानमा छ ।
थ्री स्टार जावलाखेलविरुद्ध तीन अंक जोड्दै अंक तालिकामा आफ्नो स्थान सुधार गर्न चाहन्छ । थ्री स्टार पछिल्लो खेलमा त्रिभुवन आर्मी फुटबल क्लबसँग गोलरहित बराबरीमा रोकिएको थियो ।
दिउसो २ बजे मनाङ मर्स्याङदी क्लबले घरेलु मैदानको रुपमा रहेको पोखरा रंगशालामा ब्रिगेड ब्वाइज क्लबको सामना गर्दैछ ।
६ खेलमा १३ अंकसहित दोस्रो स्थानमा बसेको मनाङ शीर्ष स्थानमा बस्दै लिग च्याम्पियनको हैसियतमा एएफसी कप छनोट खेल्ने सम्भावना जीवित राख्न चाहन्छ।
बेलुकी पौने ५ बजे दशरथ रंगशालामा हुने दिनको अन्तिम खेलमा संकटा क्लब च्यासलको सामना गर्दा अपराजित यात्रा निरन्तरता दिने लक्ष्यमा हुनेछ।
संकटा ६ खेलमा १२ अंकसहित तेस्रो स्थानमा छ । च्यासलमाथिको जितले संकटा दोस्रो स्थानमा उक्लिनेछ ।
