- १३ असार २०८३, शनिबार / Jun 27, 2026
काठमाडौं । मध्यपहाडी लोकमार्ग अन्तर्गतको घोडाबाँधे–गलकोट खण्ड क्षतबिक्षत बनेको छ । बागलुङ सदरमुकामदेखि काठेखोला, बडिगाड, ढोरपाटन हुँदै निसीखोलासम्म पर्ने मध्यपहाडी लोकमार्गको अधिकांश भाग क्षतविक्षत बनेको हो ।
ठेकेदार कम्पनीले कमसल सामाग्रीको प्रयोग र बाढी, पहिरोको कारण सडकको बीच भागमा ठूला खाल्डाखुल्डी परेका छन् भने भलले सडक चिरिएर दुर्घटनाको जोखिम बढाएको छ । बडिगाड–बुर्तिबाङसम्मको खण्ड २०७२ सालमा कालोपत्रे सम्पन्न गरिएको थियो ।
कालोपत्रे गरिएका ति खण्डका अधिकाँस भाग भलले उप्काईदिएको छ । त्यसबाट करोडौं रुपैयाँको क्षति पुगेको छ । निर्माण कम्पनी स्वच्छन्द–शंकर जेभी सम्पर्क बिहीन हुँदा सडक अस्तव्यस्त बनेको मध्यपहाडी लोकमार्गको कार्यालय पर्वतले जनाएको छ ।
क्षतविक्षत बनेको सडकमा यात्रा गर्दा निकै जोखिम बढेको गाडी चालक रमन कँडेलले बताए । मध्यपहाडी लोकमार्गको बागलुङ खण्डमा पर्ने १४२ किलोमिटर मध्ये करिब १२० किलोमिटर सडक कालोपत्रे गरिए भइसकेको छ । तर अधिकांश सडक खण्डमा नाली पुरिएकोले भल सडकको बीच भाग बाट बग्ने गर्दछ ।
