- ६ भाद्र २०८३, शनिबार / Aug 22, 2026
कालीकोट । कालीकोट सदरमुकाम मान्म बजारका ४० घर मुनिबाट पहिरो गएको छ । लगातार परेको पानीले मान्म बजारका ४० भन्दा बढी घर उच्च जोखिममा परेका छन् । पाँच तला पक्की घरको मुनिबाट पहिरो बगेर घरको जगसम्म पुगेको छ ।
पहिरो बगेपछि घर खाली गरिएका छन् । घर पनि चर्किएका छन । मान्मको मध्य बजारमा रहेका नौ घर जमिन मुनि भासिएका छन् । मान्म बजारकै नावगैराका १८ तल सरिरहेका छन् । तल बगिरहेकाले सबै घर भत्किने निश्चित भएको कालीकोटका प्रमुख जिल्ला अधिकारी रामहरि शर्माले बताए ।
रेडियो नयाँ कर्णाली एफएमको भवनसहित चार घर पहिरोको उच्च जोखिममा रहेको स्थानीयले बताए । भवन पुरै चर्किएका छन् । जिल्ला विपद व्यवस्थापन समितिले पनि मान्म बजार, रास्कोट नगरपालिका वडा नं १, ३ र ९ का वस्ती निकै जोखिममा रहेकाले अन्य ठाउँमा सार्ने विषयमा स्थानीय सरकारले समन्वय गर्नुपर्ने निर्णय गरेको छ ।
हालसम्म कालीकोटको नरहरीनाथ गाउँपालिकाले प्रदेश सरकारको सहयोगमा एक वस्ती सारेको भए पनि अन्य वस्ती जोखिममा नै छन् ।
