- १५ भाद्र २०८३, सोमबार / Aug 31, 2026
काठमाडौं । स्थानीय तह निर्वाचन २०७९ को निराशाजनक परिणाम आएपछि विवेकशील साझा पार्टीका अध्यक्ष रवीन्द्र मिश्रले राजीनामा दिएका छन् । आगामी दिनमा लेखन, साहित्य सिर्जना र अभिनयलगायत क्षेत्रमा सक्रिय हुने बताउँदै पार्टीबाट राजीनामा दिएको बताए ।
मिश्रको अबको यात्रा कस्तो रहन्छ भनेर सर्वत्र चासो बढेका बेला मिश्रले साहित्य सिर्जना र सिनेमामा अभिनय गर्ने बताएका हुन् । सामाजिक सञ्जाल फेसबुक स्टाटस समेत लेखेका मिश्रले भने, ‘मलाई मेरो भाग्यले गुनासो गर्ने ठाउँ नै नराखी चाहिनेभन्दा बढी दिइसकेको छ, साथमा कविता लेखुँला, किताव लेखुँला, परोपकारी काम गरूँला र मन लाग्यो भने सिनेमामा अभिनय गरूँला ।’
बिबिसी नेपाली सेवाको प्रमुखबाट राजीनामा दिएर राजनीतिमा उदायका मिश्रले ‘भू–मध्य रेखा’ पुस्तक पनि प्रकाशित गरेका छन् ।राजनीतिको प्रमुख उद्देश्य देशको दूरगामी हित र दशकौंसम्म पिछडिएका वर्गको हित गर्नु रहेको भन्ने मिश्रले यो उद्देश्य पूर्तिका लागि “विचारभन्दा माथि देश” हुनुपर्ने मान्यता राखेको र त्यसलाई शिरोधार्य गर्दै अगाडि बढ्ने उल्लेख गरेका थिए ।
मिश्रले पार्टीबाट राजीनामा नदिन नेता तथा कार्यकर्तालाई आग्रहसमेत गरे । मिश्रले पार्टीको अध्यक्षबाट राजीनामा दिएपछि विवेकशील साझा पार्टीका विभिन्न नेता तथा सदस्यले पनि राजीनामा दिइरहेका छन् ।
