दैलेखमा आइसीयू सेवा सुरू, सिकिस्तले पनि जिल्ला बाहिर जान नपर्ने

काठमाडौं । दैलेख अस्पतालले सघन उपचार कक्षसहितको आइसीयू सेवा सञ्चालनमा ल्याएको छ । २ वटा भेन्टिलेटरसहित ५ शैयाको आइसीयू सेवा सञ्चालनमा ल्याएपछि दैलेखबासी खुसी भएका छन् ।

आइसीयू र भेन्लिेटरका असार अघि नै आएपनि अक्सिजनको अभावले रोकिएको थियो । १ करोड बजेटबाट भेन्टिलेटरसहितको आइसीयू सेवा सञ्चालनमा आएको दैलख अस्पतालका अध्यक्ष लोमन शर्माले कैलाश खबरलाई बताए । दम, श्वासप्रश्वास र अन्य गम्भिर प्रकृतिका रोगहरूको उपचार अब दैलेख अस्पतालमा नै हुने, घण्टौं लगाएर सुर्खेत, नेपालगञ्ज पुग्नुपर्ने बाध्यता अन्त्य हुने अध्यक्ष शर्माले बताए ।

५० शैयाको दैलेख अस्पतालमा ६५ जना कर्मचारीको दर्बन्दी भएपनि अस्पतालमा विशेषज्ञ चिकित्सकको भने अझैपनि अभाव रहेको छ । आएसियु सेवालाई थप प्रभावकारी बनाउन मेडिकल अधिकृत र नर्सिङ स्टाफहरूलाई आवश्यक तालिमको लागि सुर्खेत पठाउन लागिएको बताए जिल्ला स्वास्थ्य सेवा कार्यालयका प्रमुख डा. निराजन पन्तले बताए।