- ३ असार २०८३, बुधबार / Jun 17, 2026
भक्तपुर । भक्तपुर नगरपालिकाका प्रमुख सुनिल प्रजापतिले निर्वाचित जनप्रतिनिधिहरु इमानदार भए देश र समाज निर्माणमा टेवा पुग्ने बताएका छन् ।
मंगलबार भक्तपुर नपा वडा नं. १ सल्लाघारीस्थित मुपुज्व गणेश मन्दिर उद्घाटन र शिलापत्र अनावरण गर्दै उक्त कुरा बताएका हुन । मुपुज्व टोल सुधारको पहल, भक्तपुर नपा र स्थानीय जनताको आर्थिक तथा भौतिक सहयोगमा गणेश मन्दिर पुनःनिर्माण भएको भन्दै मेयर प्रजापतिले खुशी व्यक्त गरे ।
उनले पुनःनिर्माण तथा जीर्णोद्धार भएका सांस्कृतिक एवम् ऐतिहासिक सम्पदाको निरन्तर संरक्षण र मर्मत सम्भार गर्नुपर्ने आवश्यकता समेत औंल्याए । भक्तपुरलाई शिक्षा, स्वास्थ्य र पर्यटकीय गन्तव्यस्थलको रुपमा विकास गर्ने कोसिस भक्तपुर नपाले गरिरहेको बताउँदै प्रमुख प्रजापतिले नपाले उपभोक्ता समितिमार्फत पुरानो प्रविधि प्रयोग गरी मौलिक शैलीमा यहाँका सम्पदाहरुलाई पुनःजीवन दिने काम गरिरहेको जानकारी दिए ।
देशको खरबौं बजेट सीमित ठेकेदारहरुको हातमा पुग्नु गलत भएको बताउदै उनले भक्तपुर नपाले विकास निर्माणका सबै कामहरुमा उपभोक्ता मोडललाई नै जोड दिँदै आएको चर्चा गरे । कार्यक्रममा भक्तपुर नपा वडा नं. १ का वडाध्यक्ष श्यामकृष्ण खत्रीले भक्तपुरको सल्लाघारीमा अवस्थित रानीपोखरी सर्वसाधारणको निम्ति खुल्ला भएको, भाजुपोखरी पुनःनिर्माण कार्य अन्तिम चरणमा रहेको र नःपली सिर्जना नगरको इसानेश्वर मन्दिर मौलिक शैलीमै निर्माण गर्ने तयारीमा जुटेको बताए ।
