- २५ भाद्र २०८३, बिहीबार / Sep 10, 2026
काठमाडौँ, १६ असार । लगातारको वर्षासँगै आएको पहिरोका कारण सुर्खेत–जुम्ला सडक खण्ड अवरुद्ध भएको छ। कालीकोट जिल्लाको शुभकालिका गाउँपालिका–१ स्थित गगने खोला र खाँडाचक्र नगरपालिका–१ को जिरो प्वाइन्ट नजिक पहिरो खसेपछि यातायात पूर्ण रूपमा ठप्प भएको हो।
स्थानीय प्रशासनका अनुसार पहिरोका कारण दुवैतर्फ सवारी साधनहरू बीच बाटोमै रोकिएका छन्, जसले यात्रुहरूलाई ठूलो असहजता भएको छ। केही यात्रुहरू रातभर सडकमै अलपत्र परेका छन्।
कालीकोट प्रहरीले जानकारी दिएको अनुसार, पहिरो पन्छाएर सडक खुलाउने प्रयास जारी छ। डोजरको प्रयोग गरेर माटो र ढुंगा हटाउने काम तीव्र पारिएको बताइएको छ। यद्यपि निरन्तर पानी परिरहेकोले काममा अवरोध भइरहेको छ।
प्रहरी र स्थानीय प्रशासनले यात्रुहरूलाई सावधानीपूर्वक यात्रा गर्न र अत्यावश्यक नपरेसम्म उक्त खण्ड प्रयोग नगर्न आग्रह गरेका छन्। मौसम अझै केही दिनसम्म अस्थिर रहने जल तथा मौसम विज्ञान विभागको अनुमान रहेको छ।
यस सडक अवरुद्ध हुँदा सुर्खेत, जुम्ला, कालीकोट, डोल्पा र मुगु जिल्लासँगको यातायात सम्पर्क प्रभावित भएको छ।
