- २२ भाद्र २०८३, सोमबार / Sep 7, 2026
मनाङ । वर्षासँगै आएको बाढीले हिमाली जिल्ला मनाङको तालगाउँ र चामे बजार डुबानमा परेको छ । नासों गाउँपालिका १ मा पर्ने तालगाउँ सोमबारदेखिको लगातारको वर्षाका कारण मर्स्याङ्दी नदीको बाढी आएर डुबानमा परेको हो ।
ताल गाउँका ६० घरमध्ये ३० घर डुबानमा परिसकेको स्थानीयले बताए । बाँकी घर जोखिममा परेका छन् । स्थानीय घर छाडेर सुरक्षित ठाँउमा बसेकाले मानवीय क्षति नभएको मनाङका प्रमुख जिल्ला अधिकारी बिष्णु लामिछानेले बताए ।
तालगाउँ र चामे बजारका स्थानीय अहिले सुरक्षित ठाउँमा वस्तीको कुना क्षेत्र, पानी नभएको ठाउँमा बसेको लामिछानेले बताए । बहाव बढ्दै जाँदा पानी थुनिएर वस्ती माथि डुबाउँदै आएको स्थानीयको भनाइ छ । उक्त क्षेत्रमा प्रहरी खटिसकेको मनाङका प्रहरी प्रमुख डिएसपी सुवास खड्काले बताए ।
