- १८ भाद्र २०८३, बिहीबार / Sep 3, 2026
काठमाडौं । एक सातामा कोरोना संक्रमण दर दोब्बरले बढेको देखिएको छ । दोस्रो लहरपछि बालबालिकामा पनि दैनिक कोरोना संक्रमण दर उकालोतर्फ लागेको छ । १८ वर्षमुनिका एक सय १६ बालबालिकामा संक्रमण पुष्टी भएको स्वास्थ्य मन्त्रालयले जनाएको छ ।
गत सातादेखि बालबालिकामा कोरोना संक्रमण उकालो लागेको मन्त्रालयले जनाएको छ । ‘ओमिक्रोन’ फैलिएसँगै नेपालमा संक्रमण दर बढिरहेका बेला बालबालिकामा पनि संक्रमण दोब्बरले बढिरहेको छ । सोमबार मात्रै एक सय १६ जना बालबालिका संक्रमित भएको तथ्य सार्वजनिक भएको हो ।
ओमिक्रोन फैलिएसँगै देशभर बालबालिकामा संक्रमण बढ्दै गएको भन्दै आइतबार ७५ , शनिबार ६७ जना संक्रमित भएको स्वास्थ्य मन्त्रालयले जनाएको छ । पछिल्लो २४ घन्टामा देशभर एक हजार चार सय ४६ जनामा संक्रमण पुष्टी भएको छ ।
कोभिडको दोस्रो लहरपछि १२ वर्षमुनिका बालबालिका खोपको पहुँचमा नभएको र ओमिक्रोन बालबालिकामा बढी देखिने दरका कारण संक्रमण दिनानुदिन बढिरहेको चिकित्सकको ठम्याइ छ । मन्त्रालयका अनुसार १२ देखि १८ वर्ष उमेर समूहका ३४ लाख २५ हजार ४ सय आठ बालबालिकाले खोपको पहिलो मात्रा लगाएका छन् ।
संक्रमण बढेसँगै बालबालिका खोप कार्यक्रममा तीव्रता दिइएको भन्दै स्वास्थ्य मन्त्रालयले मंगलबारदेखि उपत्यकामा बालबालिकालाई फाइजर र मोडर्ना खोप दिन लागिएको जनाएको छ ।
