ब्राजिलकामा पूर्वन्यायमन्त्री पक्राउ, जानीजानी आक्रमण रोक्न नचाहेको आरोप

एजेन्सी । हिंसा भड्काएको आरोपमा ब्राजिलकामा पूर्वन्यायमन्त्री एन्डरसन टोरेसलाई पक्राउ गरिएको छ । टोरेसलाई अमेरिकाबाट ब्राजिल फर्के लगत्तै निवासबाट पक्राउ गरिएको सञ्चार माध्यमले जनाएका छन् । ब्राजिलमा दंगा सुरु हुनुअघि नै देश छोडेका टोरेस पूर्वराष्ट्रपति जायर बोल्सोनारोका निकट सहयोगी मानिन्छन् ।

टोरेसमाथि आक्रमणको जानकारी हुँदाहुँदै पनि जानीजानी आक्रमण रोक्न नचाहेको आरोप लगाइएको छ । ब्राजिलमा गत साता संसद परिसर र राष्ट्रपति निवास र सर्वोच्च अदालतमा आक्रमण भएको थियो । टोरेसको घरमा गत अक्टोबरमा भएको राष्ट्रपतीय निर्वाचनको परिणाम उल्ट्याउने आदेशको मस्यौदा फेला परेको जनायएको छ । टोरेसले ट्वीट गर्दै आफू सधै कानूनी आधार र नैतिकताका साथ काम गरेको भन्दै सत्यको जित हुने दाबी गरेका छन् ।