- १३ बैशाख २०८३, आईतवार / Apr 26, 2026
काठमाडौँ । बागमती नदीबाट एक व्यक्तिको सकुशल उद्धार गरेको छ । सशस्त्र प्रहरी बल नेपालले गए राति २ बजे काठमाडौँको दक्षिणकाली नगरपालिका – ८ कटुवाल दह स्थित बागमती नदी किनारबाट एक व्यक्तिको उद्धार गरेको हो । दक्षिणकाली नगरपालिका – ८ वडाका सिम्पानी राई टोल बस्ने ४० वर्षका रामबहादुर लामाको सशस्त्र प्रहरी बल नेपालले उद्धार गरिएको हो ।
मोटरबोट सहित गएको फौजले रोप रेस्क्यु र अन्य विधिको प्रयोग गरी उद्धार गरेपश्चात् लामालाई आफन्तको जिम्मा लगाइएको छ । पानीको बहाव कम भएको बेला नदी पारी गएका लामा बहाव बढेसँगै वारि आउन नसकी नदी किनारको पहरामा फसेका थिए ।
सशस्त्र प्रहरी बल नेपाल नं. २० विपद् उद्धार उपत्यका गणबाट सशस्त्र प्रहरी निरीक्षक नारायण गुरूङको कमान्डमा ९ जना र सशस्त्र प्रहरी बल नेपाल नं. १८ निलबाराही गण कीर्तिपुरबाट सशस्त्र प्रहरी निरीक्षक सन्तोष केसीको कमान्डमा गएको १५ जना सहितको सुरक्षा फौजले रातको समयमा उनको सकुशल उद्धार गरेको हो ।
