- २० आश्विन २०८३, मंगलवार / Oct 6, 2026
काठमाडौं । जल तथा मौसम पूर्वानुमान महाशाखाले बिहीबारदेखि हिउँदे वर्षा हुने बताएको छ । हिउदे याम सुरु भएपछि वर्षा नभएको जनाउदै नेपालमा न्युन चापीय वायु प्रणाली सक्रिय भएका कारण मौसम बदली हुने महाशाखाले जनाएको हो । न्युन चापीय वायु प्रणाली सक्रिय भएपछि त्यसकै प्रभाव स्वरुप मौसम बदली भई हुस्सु तथा बादल लागेको जनाइएको छ ।
बुधबार बागमती, गण्डकी, कर्णाली र सुदूरपश्चिमका पहाडी क्षेत्रमा आंशिक बदलीको अवस्था रहेको र तराईमा बाक्लो हुस्सु लागेको महाशाखाले जनाएको छ । महाशाखाका अनुसार बुधबार प्रदेश १, गण्डकी र कर्णालीका उच्च पहाडी तथा हिमाली क्षेत्रमा हिमपात हुनेछ । राति कर्णाली र सुदूरपश्चिमका केही स्थानमा हल्का हिमपातको सम्भावना रहेको पनि महाशाखाले जनाएको छ ।
वर्षा र हिमपातका कारण जनजीवन प्रभावित हुने भन्दै महाशाखाले सतर्ककता अपनाउन अपिल गरेको छ । सुदूरपश्चिम र कर्णाली प्रदेशबाट बिहीबार वर्षा हुन सुरू हुने र क्रमशः पूर्वतर्फ सर्ने महाशाखाको अनुमान छ । वर्षासँगै हिमाली तथा उच्च पहाडी भेगमा हिमपात हुने सम्भावना रहेको महाशाखाको अनुमान रहेको छ ।
