- १ भाद्र २०८३, सोमबार / Aug 17, 2026
काठमाण्डौं । प्रधानमन्त्री शेरबहादुर देउवाले नेतृत्व गरेको सरकारको कार्यकाल ६ महिना पूरा भएको छ । असार २९ गते प्रधानमन्त्री नियुक्त भएका देउवाको ६ महिने कार्यकालमा देखिने र सम्झनलायक काम हुन नसके पनि पहल भइरहेको बताएका छन् ।
देउवालाई मन्त्रिपरिषद् विस्तार गर्न तीन महिना लागेको थियो । त्यसपछि देउवा सरकारको कामभन्दा पार्टी काममै व्यस्त देखिए । कोरोना सङ्क्रमण फेरि बढ्न थालेपछि महामारी नियन्त्रणमा सरकारले प्रभावकारी योजना बनाउन लागेको बताइएको छ ।
परीक्षणको दायरा र खोपको पहुँच बढाउन सरकारले प्रभावकारी काम गर्न नसकेको आलोचना भने भइरहेको छ । प्रमुख प्रतिपक्षी एमालेका कारण सरकारले संसद् बैठक चलाउन नसकेको देखिएको छ । सर्वोच्च अदालतमा भइरहेको आन्दोलनले न्यायालयमाथिको प्रभावकारितामा प्रश्न बारे व्यापक कुरा उठिरहेको छ ।
तीन राज्यमन्त्रीसहित १९ मन्त्री सरकारमा सहभागी हुँदासमेत नागरिकले अनुभूति हुनेगरी कुनै काम हुन नसकेको विश्लेषकले आलोचना गरेका छन् । संयुक्त सरकारको साझा न्यूनतम कार्यक्रम पनि अलपत्र परेको उनीहरुको ठहर छ ।
नेपाली भूमि कालापानीको विषयमा भारतीय प्रधानमन्त्री नरेन्द्र मोदीले विवादास्पद अभिव्यक्ति दिँदासमेत सरकारले कुनै प्रतिक्रिया नदिए भनेर कुरा उठ्न थालेको छ ।पालिकाको चुनाव गर्नुपर्ने समय नजिक आइसक्दासमेत सरकारले त्यसतर्फ ध्यान नदिएको भन्दै आलोचना भइरहेको छ । निर्वाचन आयोगले आउँदो वैशाख १४ गते पालिकाको चुनाव गर्न सरकारलाई सिफारिस गरिसकेको छ ।
