अमेरिकामा नेपाली भाषीको फुटबल उत्सव

एजेन्सी । अमेरिकावासी नेपाली भाषी समुदायका लागि फुटबल खेलको महोत्सव अमेरिकाको ओहायो राज्यस्थित सिनसिनाटी सहरमा सुरु भएको छ ।

इन्ट्रा नेशनल वेलफेयर एण्ड सपोर्ट फाउण्डेसनले आयोजना गरेको सो प्रतियोगिताको उद्घाटन फाउन्डेसनका अध्यक्ष डिल्ली अधिकारीले गरेका थिए ।

प्रतियोगितामा भाग लिन अमेरिकामा बसोबास गर्ने नेपाली भाषी हुनुपर्ने प्रावधान राखिएको छ । तीन दिनसम्म जारी रहने सो उत्सवमा अमेरिकाका विभिन्न राज्यबाट ३८ वटा फुटबल टिमको सहभागिता रहने छ ।

युवा, महिला र ३५ वर्षमाथि उमेर समूहका भेट्रानका भिन्नभिन्न टिमबीच प्रतिस्पर्धा हुने छ । सो खेलको विजेतका लागि १५ हजार अमेरिकी डलर १९ लाख ४ हजार नेपाली रुपैयाँ पुरस्कार राखिएको छ ।

उद्घाटन लगत्तै युनिक ब्वाइज फुटबल क्लब र पथरी इ वान फुटबल क्लबबीच प्रतिस्पर्धा भएको थियो । युवाका २६ वटा टिम सहभागी रहेकाले यो समूहको खेल नकआउट विधिबाट गरिएको खेल आयोजक समितिका संयोजक राजन चुहानले बताए ।

भेट्रान्सतर्फ आठवटा टिम र महिलातर्फ चारवटा टिम सहभागी छन् । महिला टिमबीच हुने प्रतिस्पर्धा भने शनिबार सुरु हुने आयोजनाका संयोजक चुहानले बताए । विभिन्न चरणमा खेल भई फाइनलमा पुग्न सफल टिमका बीच सेप्टेम्बर २५ मा अन्तिम प्रतिस्पर्धा हुने कार्यक्रम तय भएको छ ।