- ८ आश्विन २०८३, बिहीबार / Sep 24, 2026
काठमाण्डौ । राष्ट्रिय स्वतन्त्र पार्टीले पार्टी सभापति रवि लामिछानेलाई फेरि सरकारको पुरानै जिम्मेवारीमा फर्काउनुपर्ने निर्णय गरेको छ । सर्वोच्च अदालतको आदेशअनुसार नयाँ नागरिकता प्राप्त गरेपछि राष्ट्रिय स्वतन्त्र पार्टी सभापति लामिछानेलाई उपप्रधानमन्त्री र गृहमन्त्रीको जिम्मेवारीमा पुनः फर्काउने आइतबार निर्णय गरेको हो । लामिछानेले नयाँ नागरिकता लिएसँगै राहदानी विभाग पुगेर पुरानो नागरिकताका आधारमा लिएको राहदानी समेत फिर्ता गरेका छन् ।
उनलाई तत्कालै सरकारको पुरानै जिम्मेवारीमा फर्काउने वा नफर्काउने विषयमा प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच छलफल समेत भएको छ । अदालतको आदेशपछि नयाँ नागरिकता लिएका लामिछाने गैरसांसदको रुपमा ६ महिना मन्त्री बनेर फेरि चितवन क्षेत्र नम्बर २ बाट उपचुनाव जितेर आउने योजनामा रहेका छन् ।
शुक्रवार सर्वोच्च अदालतले पुरानो नागरिकतालाई मान्यता नदिएपछि लामिछानेले आइतबार काठमाण्डौ जिल्ला प्रशासनबाट नागरिकता लिइसकेका छन् । नयाँ नागरिकता लिएर पार्टी सभापतिको जिम्मेवारीमा फर्केलगत्तै बालुवाटार पुगेका लामिछानेले आफूलाई पुन : र्बहाली गर्न प्रधानमन्त्रीसँग प्रस्ताव गरेका छन् ।
