- ३ कार्तिक २०८३, मंगलवार / Oct 20, 2026
काठमाडौं । नेपालमा कोरोना भाइरसको महामारी फैलन नदिन आवश्यक परे लकडाउन गरेर उपचार गर्ने पूर्वतयारी स्वास्थ्य तथा जनसंख्या मन्त्रालयले गरेको छ । कोरोना भाइरसको संक्रमण रोकथाम र नियन्त्रणका लागि प्रतिकार्यको ढाँचा तयार पारिएको स्वास्थ्य मन्त्रालयका प्रवक्ता डा.विकास देवकोटाले बताए ।
कोरोनाको महामारी नियन्त्रणका लागि आवश्यक तयारी गरेका भन्दै डा.देवकोटाले संक्रमणको अवस्था र आवश्यकताअनुसार तयारी बढाउँदै लैजाने बताएका छन् । खरिपाटी र नगरकोटको क्वारेन्टाइन स्थललाई यथावत् राखिएको प्रवक्ता देवकोटाले जानकारी दिए।
कोरोनाको संक्रमण फैलिएको अवस्थामा बासस्थान, निश्चित समुदाय, बस्ती, गाउँ, टोल, वडा, पालिका, जिल्ला र प्रदेशलाई पनि पकेट एरिया लकडाउन गर्न सकिने बताए । यी योजना अहिले नै प्रयोग गरिहाल्नुपर्ने अवस्था नआएको भन्दै प्रवक्ता देवकोटाले नेपालमा संक्रमण फैलिएको अवस्थामा मात्र लागू हुने बताए ।
