- २२ भाद्र २०८३, सोमबार / Sep 7, 2026
विराटनगर । १८ वर्षीय कैशाल कापरको शव न्युरो अस्पतालले बन्दक बनाएको छ । परिवारले उपचार खर्च तिर्न नसकेपछि अस्पतालले कापरको शव दिन अस्वीकार गरेको हो ।
फागुन १२ गते मोटरसाइकल दुर्घटनामा परि गम्भीर घाइते भएका धनुषधाम–४ हरिपुरका कापर न्युरोमा भर्ना भएका थिए । उपचारकै क्रममा उनको २० गते मृत्यु भयो । तर, उपचार खर्च नतिरेको भन्दै अस्पतालले कापरको शव परिवारलाई दिइएन ।
अस्पतालले नातिको शव बन्धक बनाएर राखेको मृतकका हजुरबुवा मधुरी कापरले बताए । पैसा दिन नसक्दा शव हेर्नै नदिएको उनले बताए । आफन्तले ऋण लिएर अस्पतालमा १ लाख ५० रुपैयाँ बुझाए तर अस्पतालले थप ३ लाख ८५ हजार रकम असुल्न शव नै हेर्न नदिएको बताए ।
आर्थिक अवस्था कमजोर भएकाले उपचारबापत बाँकी रकम तिर्न सक्ने अवस्था नरहेको उनको मधुरीले बताए।मृतकका बुवा विपतीया कापरका नाममा रहेको ५ धुर जग्गा र घर बन्धक राखेर उपचार खर्च तिरेको यादवको भनाई छ । चार सन्तानमध्ये छोराको मृत्यु भएपछि आमाबुवा बेहोस अवस्थामा छन् ।
यता अस्पतालले अन्तिम संस्कार गर्न पनि नदिए पछि त्यो परिवार झन विचल्लीमा परेको छ । कापर परिवारले झन्डै ३ लाख बुझाउन बाँकी रहेको अस्पताल प्रशासनका राजेश भट्टराईले बताए । अस्पतालले पैसा नपाएसम्म शव दिन नसकिने कापर परिवारलाई बताएको छ।
