एकल महिलाको हत्या आरोपमा ३ जना थुनामा

धरान । समूहमा आएर एकल महिला उषा राईलाई कुटपिटपछि हत्या मुद्दामा ३ जनालाई पुर्पक्षका लागि थुनामा पठाउने आदेश दिएको छ ।

आरोपित एक जना धरौटीमा छुटेपनि सुनसरी जिल्ला अदालतले ३ जनाई थुन्न आदेश दिएको हो । न्यायाधीश पुण्यप्रसाद सापकोटाको इजलाशले उषा राईलाई कुटपिट गर्ने मुख्य आरोपी उर्मिला राई, सुसेली राई र सुमित्रा राईलाई थुनामा पठाउने आदेश दिएको हो ।

आरोपी रत्ना सुब्बालाई भने १ लाख धरौटी लिएर छाड्न आदेश दिएको छ ।आदेशअनुसार ३ जनालाई कोभिड परीक्षणपछि झुम्का कारागारमा पठाउने तयारी भइरहेको इलाका प्रहरी कार्यालय धरानका डिएसपी बुद्ध श्रेष्ठले बताए ।

आरोपित निरकुमारी गुरुङ, सिर्जना राई र मिना राई फरार छन् । मुख्य आरोपी उर्मिलाले आफ्नो श्रीमानसँग नजिकिएको आशंकामा आफन्त र छरछिमेकी महिलाहरुसहित पुगेर कात्तिक ३ गते उषा राईलाई कुटेकी थिइन् ।

कुटपिटबाट घाइते भएकी उषाको उपचारकै क्रममा मंसिर १३ गते मृत्यु भएको थियो ।