एसईई प्रश्नपत्रको छपाई सुरु

काठमाडौं । बिहीबारदेखि राष्ट्रिय परीक्षा बोर्डले माध्यमिक शिक्षा परीक्षा (एसईई) का लागि प्रश्न पत्र छाप्न सुरु गरेको छ । तीनवटा सुरक्षा घेराबीच एसईईका प्रश्नपत्रहरू छाप्ने कार्य भइरहेको जनक शिक्षा सामग्री केन्द्रले जनाएको छ । जनक शिक्षा सामग्री केन्द्र लिमिटेडको सेक्युरिटी प्रेसमा एसईईका प्रश्नपत्रहरू छपाई सुरु गरिएको जनाइएको छ । बोर्डले पाँच लाख सेटभन्दा बढी प्रश्नपत्र छपाउँदैछ ।

आवश्यकभन्दा १० प्रतिशत बढी संख्यामा प्रश्नपत्र छपाउने चलन छ । गत वर्ष कक्षा–१२ को परीक्षा अनलाइन माध्यमबाट लिइएको थियो । अर्को वर्ष त्यस्तै मोडालिटीबाट कक्षा–१० को परीक्षा सञ्चालन गर्ने योजना रहेकोले योपटक केही स्थानमा अनलाइनमा प्रश्नपत्र पठाउन लागिएको बोर्डले जनाएको छ । प्रश्नपत्र चैत मसान्तभित्र छापिएर जिल्ला–जिल्लामा पठाइनेछ । बुधबार साँझ बसेको बोर्ड बैठकले प्रश्नपत्र छाप्ने निर्णयगरेको थियो ।