- २३ भाद्र २०८३, मंगलवार / Sep 8, 2026
काठमाण्डौ । काठमाण्डौमा जारी निषेधाज्ञा असार ७ गतेसम्म थप गरिएको छ । काठमाण्डौ, भक्तपुर र ललितपुरका प्रमुख जिल्ला अधिकारीको आइतबार बसेको बैठकले काठमाडौ उपत्यकामा एक हप्ता निषेधाज्ञा थपेर असार ७ गतेसम्म पुर्याएको हो । केही सहज व्यवस्थासहित थपिएको निषेधाज्ञा सोमबार राति १२ बजेदेखि लागू हुँदैछ । निषेधाज्ञाका समयमा तरकारी, फलफूल, खाद्यान्न, दूध डेरी, मासु, खानेपानी, ग्यास पसल, किराना पसल र डिपार्टमेन्टल स्टोर बिहान ११ बजेसम्म सञ्चालन गर्न पाइने भएको छ ।
यस्तै पुस्तक पसल तथा प्रिन्टिङ प्रेस बिहान ११ बजेसम्म खोल्न पाइने र अत्यावश्यक वस्तुहरुको होम डेलिभरी सेवा बेलुकी सात बजेसम्म सञ्चालन गर्न पाइने जनाइएको छ । विकास निर्माणजन्य सामग्रीहरु छड, सिमेन्ट, बिजुलीका सामान, स्यानिटरी, हार्डवेयर लगायतका पसल दिउँसो ४ बजेपछि सञ्चालन गर्न सकिने भएको छ । कृषिफर्म तथा कृषिजन्य वस्तुहरुको किनबेच र ढुवानीमा सहजीकरण गरिने निषेधाज्ञा आदेशमा भनिएको छ । नेपाल राष्ट्र बैंकले तोकेको मापदण्ड पालना गरी बैँक तथा वित्तीय संस्थाले सीमित सङ्ख्यामा जनशक्ति परिचालन गरी सेवा सञ्चालन गर्न सक्ने गरी खुकुलो बनाइएको छ ।
