केराबारीमा ठूलो पहिरो गएपछि सडक खण्ड ठप्प

काठमाण्डौं । मुग्लिन नारायणगढ सडक खण्ड ठप्प भएको छ । गएराति २ बजेदेखि पहिरो गएपछि सडक खण्ड फेरि बन्द भएको जिल्ला प्रहरी कार्यालय चितवनले जनाएको छ ।

भरतपुर महानगरपालिका २९ मा पर्ने केराबारीमा ठूलो पहिरो गएको चितवनका डीएसपी एवम् प्रवक्ता नरहरि अधिकारीले बताए ।

तीन वटा डोजरको सहायताले पहिरो पन्छाउन थाले पनि एउटाको टायर पन्चड भएकाले अहिले दुई वटाले पहिरो हटाइरहेको उनको भनाइ छ ।

सोमवार राति पनि केराबारीमा ठूलो पहिरो गएका कारण २४ घण्टासम्म यात्रु जाममा परेका थिए ।