- २ भाद्र २०८३, मंगलवार / Aug 18, 2026
काठमाडौँ । कोरोना भाइरस अबका केही महिना अत्यन्तै कठिन हुने भन्दै सचेत रहन विश्व स्वास्थ्य सङ्गठन (डब्ल्यूएचओ)ले चेतावनी दिएको छ । डब्ल्युएचओका महानिर्देशक टेड्रोस एड्हानोम गेहब्रेयससले कोरोना भाइरसविरुद्धको लडाइँ देशहरूले छोड्न नसक्ने र छोड्न नहुने पनि बताएका छन् ।
सबैले सामाजिक दूरी कायम राख्ने, मास्क लगाउने, घरबाटै काम गर्नेजस्ता जिम्मेवारी निर्वाह गरेमा पूर्णरूपमा लकडाउन नगर्न पनि सकिने डब्ल्युएचओले जनाएको छ । लडाइँमा हार नखान पनि उनले विश्वभरका सरकारलाई अपिल गरेका छन् । सङ्क्रमण बढिरहेको भए पनि यसविरुद्ध कडा कदमहरू चालेमा महामारी नियन्त्रण गर्न सकिने बताए ।
यद्यपि भाइरस नियन्त्रणका लागि आवश्यक पर्ने कडा प्रतिबन्धका नियमहरू पालना गर्न सरकारहरू तयार हुनुपर्ने उनले बताए । महानिर्देशक गेहब्रेयससले आउँदा केही महिना असाध्यै कठिन रहेको र केही मुलुकहरू खतरनाक बाटोमा रहेको बताएका छन् । कोरोना भाइरसको महामारीका कारण अहिले सम्म ४ करोड ३७ लाखभन्दा बढी संक्रमित भएका छन् भने ११ लाख ६४ हजारभन्दा बढीको मृत्यु भएको छ ।
