कोरोना विरुद्ध रुसले तयार पारेको ‘स्पुतनिक ५’ खोप बजारमा जाने

३२ साउन २०७७ । रुसले तयार पारेको कोरोना विरुद्धको पहिलो खोप बजारमा जाने भएको छ । उसले कोरोनाविरुद्धको पहिलो खोप आफ्नो मुलुकले तयार पारेको दाबी गर्दै खोप यसै महिनाको अन्त्यसम्म बजारमा जाने जनाएको हो ।

खोपलाई रुसले ‘स्पुतनिक ५’ नाम समेत दिइएको जनाइएको छ । यो खोप सुरक्षित रहेको रुसी राष्ट्रपति भ्लालिमिर पुटिनको दाबी रहेको छ । राष्ट्रपति पुटिनले खोप आफ्नी छोरीलाई दिइएको र खोप लगाएपछि सञ्चो भएको उल्लेख गरेका छन् ।

कोरोना विरुद्धको खोपलाई तेस्रो चरणको परीक्षणका लागि स्वीकृति दिइएको छ । यस चरणमा हजारौं मानिसमा परीक्षण गरिने भएकाले खोप उत्पादनमा यो चरण महत्वपूर्ण मानिने रुसी स्वास्थ्य मन्त्रालयले जनाएको छ ।

आगामी डिसेम्बर–जनवरीसम्म प्रति महिना ५० लाख डोज खोप उत्पादन गर्न सक्ने खोप विकास गर्ने गामेलिया इन्सिच्युटले जनाएको छ ।