खाडीमा हवाइ उडान पुन सञ्चालन

दोहा । कोरोना संक्रमण बढ्न सक्ने भन्दै साउदी अरब, कुवेत र ओमानले लगाएको अस्थायी यात्रा प्रतिबन्ध हटाएर उडान पुनः सुचारू गरेको छ । दुई हप्तादेखि लगाएको अन्तर्राष्ट्रिय उडान आइतबारदेखि पुन सञ्चालन गरेको छ ।

नयाँ प्रजातिको कोरोना संक्रमण बढ्न सक्ने भन्दै साउदीले गत डिसेम्बर २० देखि अन्तर्राष्ट्रिय उडानमा प्रतिबन्ध लगाएको थियो । साउदीले युरोपेली देश, दक्षिण अफ्रिका लगायतका कोरोना भाइरसको नयाँ स्वरुप देखिएका देशका नागरिकलाई साउदी प्रवेश गर्नुभन्दा पहिले अन्य देशमा १४ दिन बसेर मात्र साउदी प्रवेश दिइने जनाएको छ ।

साउदी प्रवेश गर्ने यात्रुहरुको हकमा भने पीसीआर परीक्षण रिपोर्ट र सात दिनसम्मको होम क्वरेटाइन अनिवार्य रहेको जनाएको छ । यता कुवेतले पनि कोरोना संक्रमण बढ्न सक्ने भन्दै लगाएको हवाइ उडान प्रतिबन्ध शनिबारदेखि हटाएको छ ।